Një ngjarje e rëndë ka tronditur opinion publik mbrëmjen e sotme, ndërsa forcat e policisë janë vënë në gadishmëri për të zbardhur një krim të orëve të fundit. Mësohet se një trup i vrarë me automatik është gjetur pranë kopshtit zoologjik në Fier, në autostradën Lushnje-Fier.
Pas këqyrjes në vendngjarje, policia ka gjetur edhe dy persona të tjerë të plagosur që mesa duket janë të vetmit dëshmitarë të rastit.
Ndërkohë, burime nga Fieri bëjnë me dije se përveç automjetit të viktimës që është djegur, një tjetër makinë e shkrumbuar është gjetur në Vajkan, e cila mendohet t’i përkasë autorëve.
Policia thotë se të plagosurit janë Elton Margariti dhe Klement Kastrati. Ndërkohë, i vdekuri dyshohet të jetë Denis Kasa, 44 vjeç.
Njoftimet e fundit nga policia bëjnë të ditur se dy të plagosurit kanë qenë në një makinë me viktimën, Benz me targa AA 414 LC ndërkohë që ngjarja ka ndodhur në aksin Fier-Lushnjë, te kthesa e Mullirit të Artë.
Autorët e atentatit duket se kanë mirëpërgatitur ngjarjen. Ata kanë ndjekur tre shokët që udhëtonin me automjetin tip Benz Evo që nga Tirana deri në hyrje të qytetit të Fierit.
Kur automjeti i tyre ka hyrë në vendin e quajtur “kthesa e Mullirit të Artë” ka pasur shkëmbim zjarri, ku për pasojë mbeti i vdekur Denis Kasaj, 44 vjeç nga Patosi. Ndërsa u plagosën Elton Margariti, 42 vjeç nga Patos dhe Klement Kastrati, 31 vjeç nga Fieri.
Kasaj ndodhej si pasagjer në automjetin tip “Benz”, ndërsa një prej të plagosurve ishte shofer kurse tjetri ishte ulur në sediljen e pasme.
Në vendngjarje janë gjetur dy armë kallashnikov, njëra në makinën ku udhëtonte viktima, ndërsa arma tjetër u gjet pak metra larg makinës.
Makina ku u gjet viktima është përfshirë nga zjarri dhe policia thotë se ende nuk është verifikuar nga ka ardhur dhe po punon për rindërtimin e plotë të skenës së krimit.
Dyshohet se autorët pasi kanë qëlluar me armë, janë larguar me një automjet tip “Toyota” me targa të huaja, të cilën e kanë djegur në mes të një are rreth 1 kilometër nga vendngjarja.
Grupi hetimor po punon ipër zbardhjen e ngjarjesm ndërsa forcat e policisë lokale dhe FNSH-së së Fierit kanë nisur kontrollet në gjithë zonën ku dyshohet se janë larguar autorët.
