Momenti kur një foshnjë e porsalindur u nxor e gjallë nga gërmadhat e tërmetit në Siri ishte sa shpresëdhënës aq edhe trishtues. Kjo pasi nëna që e solli në jetë në kushte ekstreme nuk mundi t’ia dilte.
Vogëlushja u gjet e gjallë, ende me kordonin e kërthizës të lidhur pas nënës së saj të pajetë. Mediat tashmë kanë publikuar një foto të foshnjës nga spitali. Në trupin e saj dallohen plagët e shkaktuara nga kushtet e pazakonta në të cilat ajo erdhi në jetë, por rrezik për të nuk ka.
Vajza u zbulua nga Khalil al-Sawadi, kushëriri i të atit. Një tjetër kushëri i tyre e dërgoi në spital ashtu siç ishte e mbuluar nga pluhuri, ndërsa Khalil vijoi të kërkonte për të mbijetuar të tjerë.
Megjithatë, vajza ka mbetur jetime. Nëna, i ati dhe katër motrat e vëllezërit e saj u gjetën të pajetë.
Në spitalin ku vogëlushja po qëndron, Dr. Maarouf që u kujdes për plagët e saj dhe hipoterminë, tha se ajo është një vajzë e fortë.
Familja e saj, si shumë të tjera, kishin ardhur në qytetin Jindires për t’i shpëtuar luftimeve që po bëhen në vitet e fundit në rajon, por u goditën nga një tjetër katastrofë.
