Ish-zëvendëspresidenti amerikan Joe Biden ka nisur një tur për promovimin e librit kushtuar djalit të tij të ndjerë, i cili humbi betejën me kancerin. Por ajo që ka tërhequr më shumë vëmendjen në intervistën e dhënë për Daily Mail është komenti i dhënë rreth garës presidenciale të humbur nga Hillary Clinton.
Ai ka deklaruar se e dinte 1 muaj para zgjedhjeve që Trump do të triumfonte, edhe pse kurrë nuk ishte shprehur. Madje angazhimi i tij ‘i flaktë’ në fushatë pro Clinton ishte pikërisht në periudhën kur leximi i tij i fushatës fliste për dështimin e pritshëm.
Po ashtu, ai ka zbardhur faktin se kishte pasur dëshirë të bëhej pjesë e garës në primaret brenda partisë.
“Që të garoja nevojiteshin së paku përgjigje për dy pyetje: nëse isha personi i duhur, i kualifikuar, dhe nëse isha gati të jepja zemrën për këtë garë. Pikërisht kjo e dyta më pengoi”, tha Biden që kishte kaluar një periudhë të vështirë pas humbjes së djalit nga kanceri.
Biden tha se në një bisedë me presidentin Obama, ai e kishte këshilluar që të mos bëhej pjesë e garës pasi do humbiste përballë Hillary Clinton në primare dhe se do parçante partinë.
“Vendosa të mos isha pjesë e primareve, pasi gjatë bisedës me Obaman, ai më tha se partia do të përçahej dhe do ishim të pafuqishëm përballë republikanëve”, ka thënë Biden për Daily Mail./JavaNews/a.m.
