Fundjava e parë e vitit gjallëroi bregdetin e Durrësit, ku moti i kthjellët dhe dielli i ngrohtë tërhoqën vizitorë të shumtë. Ata e shfrytëzuan këtë ditë për shëtitje, biseda miqësore dhe lojëra buzë detit.
Familjet me fëmijë, çiftet dhe grupet e miqve, përfshirë edhe turistë të huaj, shijuan ajrin e freskët dhe atmosferën e paqtë të valëve të Adriatikut, por dhe një kafe a drekë të shijshme.
“Jemi nga Maqedonia dhe vijmë shpesh. Është fantastike në çdo sezon. Na pëlqen gjithçka këtu, njerëzit, plazhi, ushqimi, restorantet, sidomos në këtë fillim të ri”, shprehet një shtetase maqedonase.
“Jam nga Ukraina dhe po kaloj pushimet e dimrit. Sot është një ditë e mrekullueshme me diell. Durrësi ngjan shumë me qytetet evropiane bregdetare”, thotë një shtetas ukrainas.
Plazhi i Durrësit vijon të jetë një destinacion i preferuar në çdo stinë, duke ofruar qetësi, ushqim të mirë dhe argëtim në natyrë, për të nisur me energji pozitive dhe këtë vit.
