Prej mbi një jave, portali qeveritar e-Albania po përballet me ndërprerje dhe probleme të vazhdueshme në ofrimin e shërbimeve për qytetarët dhe bizneset. Edhe këtë të diel, përdoruesit raportojnë vështirësi në aksesimin e platformës, ndërsa bizneset nuk mund të kryejnë regjistrime, pagesa apo aplikime të ndryshme.
Në njoftimin zyrtar të Drejtoria e Përgjithshme e Gjendjes Civile, thuhet se gjatë ditës po realizohet një operacion mirëmbajtjeje dhe përmirësimi i sistemit elektronik, dhe se gjatë kësaj periudhe mund të ketë ndërprerje të përkohshme ose ngadalësime në marrjen e të dhënave nga Regjistri Kombëtar i Gjendjes Civile.
Aleanca për Profesionistët e Lirë ka ngritur shqetësimin për pasojat që ndërprerja po sjell tek bizneset dhe profesionistët, duke përmendur: vonesa procedurale, rrezik penalitetesh dhe kosto shtesë. Ata kërkojnë transparencë mbi shkaqet dhe kohëzgjatjen e ndërprerjes, forcim të qëndrueshmërisë dhe sigurisë së sistemeve, si dhe procedura alternative në raste mosfunksionimi, për të shmangur pasiguri juridike dhe shqetësime për përdoruesit.
Portali ka shfaqur probleme edhe për qytetarët e thjeshtë, si regjistrimi i fëmijëve të porsalindur, aplikimet për dokumente identifikimi dhe rinovimin e pasaportave. Kjo situatë është veçanërisht shqetësuese gjatë periudhës së fundvitit, kur rikthimi i emigrantëve dhe përdorimi i ditëve të pushimit për dokumente shton presionin mbi sistemin.
