Shumë dyqane në Shqipëri vënë tabela uljesh në vitrina, të tipit “dyqani mbyllet, çdo gjë nën kosto”, “likujdim total”, “ulje 70 për qind” e të tjera si këto. Në mjaft raste, tabela është vetëm një karrem për të ftuar qytetarët brenda dyqanit, pasi ndodh që uljet nuk ekzistojnë vërtet, ose janë vetëm për një numër shumë të vogël artikujsh.
Në një publikim në faqen zyrtare të Ministrisë së Ekonomise thuhet se bazuar në ligjin për mbrojtjen e konsumatorëve ndalohen një sërë praktikash tregtare të padrejta të përdorura deri me sot te cilat janë çorientuese dhe agresive.
Sipas Ministrisë së Ekonomise këto praktika dobësojnë ndjeshëm aftësinë e konsumatorit për marrjen e një vendimi. Qytetarët që bien pre e këtyre mashtrimeve mund të ankohen te Komisioni për Mbrojtjen e Konsumatorëve pranë kësaj ministrie.
