Vështirësitë në portalin e-Albania për të aplikuar për lejen digjitale e pranoi dhe vetë kryeministri Edi Rama.
Në komunikimin e pasdites me qytetarët, kreu i qeverisë theksoi rëndësinë e masave shtrënguese në luftën ndaj COVID-19, ndërsa i kërkoi policisë që dhe ditën e nesërme të mos alokojnë gjoba për personat që nuk kanë mundur ende të marrin lejen për të bërë pazar.
Edi Rama: Më lejoni t’ju kërkoj ndjesë të gjithë atyre që kanë pasur problem me E-Albania.
Ka qenë një problem i lidhur me funksionimin e sistemit me kompani celulare.
Për këtë arsye, sot dhe nesër Policia e Shtetit është e vetëdijshme që duhet të jetë sa më sensibilizuese dhe mirëkuptuese dhe të mos aktivizojë menjëherë sanksionet, duke pasur parasysh se në tërësi masat po zbatohen më së miri dhe ata pak të pabindur, ata pak të papërgjegjshëm, sidoqoftë janë problem.
Nuk e hedhin dot poshtë gjithë këtë përpjekje të jashtëzakonshme të të gjithëve ne bashkë që po bëjmë dita ditës.
