Një operacion i policisë së Vlorës i koduar “Karaburuni” ka bllokuar një gomone të vjedhur në shtetin grek, duke prangosur dy persona.
Policia e Vlorës kishte marrë informacion nga pala greke, për një mjet lundrues të vjedhur në shtetin grek, i cili dyshohej se do trafikohej drejt Shqipërisë.
Nisur nga ky informacion është organizuar puna, me qëllim evidentimin e mjetit lundrues në rast se do hynte në ujërat e vendit tonë.
Kështu strukturat e Policisë Kufitare dhe Delta Forcë dhe Roja Bregdetare Vlorë, bënë të mundur, në zonën e Karaburunit, pranë vendit të quajtur “Kepi i Gjuhëzës”, bllokimin e mjetit lundrues, si dhe të dy personave që ndodheshin në bord.
Nga këqyrja e mjetit lundrues tip gomone me dy motorë, 9 metër e gjatë, nuk është konstatuar asnjë material apo send i kundërligjshëm.
Nga ana e policisë u bë arrestimi në flagrancë i Dushan Spahiu, 43 vjeç dhe Paulin Koçi, 25 vjeç, banues në Vlorë.
Ndaj tyre hetimet janë në vijim, ndërkohë që materialet iu referuan Prokurorisë së Vlorës për veprën penale “Trafikimi i mjeteve motorike”, kryer në bashkëpunim.
/a.r
