Gjatë mbrëmjes së djeshme ka ndodhur një sulm në një tren në veri-lindje të Portland, kryesisht në Qendrën transite të Hollywood-it. Sipas medieve të huaja, dy persona janë vrarë dhe një tjetër është plagosur, transmeton Koha.net.
Pete Simpson, zëdhënës i policisë në Portland, ka bërë të ditur se një i dyshuar i cili ende nuk është identifikuar, ka përdorur gjuhë të urrejtjes në tren ndaj dy grave të cilat ishin myslimane, dhe se njëra prej tyre kishte të veshur hixhab.
Dëshmitarët thonë se i dyshuari po përdorte vazhdimisht fjalën “mallkim” kundër dy grave myslimane, ndërkaq ato po tentonin të largoheshin nga ai. Për një moment, situata ka eskaluar ndërsa tre persona kanë ndërhyrë për t’i ndihmuar dy grave myslimane.
I dyshuari ka sulmuar këta tre persona me ç’rast njëri ka vdekur në vendin e ngjarjes ndërsa tjetri rrugës për spital. Viktima e tretë është duke u trajtuar. “Viktimat janë sulmuar dhunshëm nga i dyshuari me thikë. Njërit edhe i është prerë fyti, kishte aq shumë gjakderdhje”, ka thënë Simpson.
Policia ende nuk ka identifikuar të dyshuarin, por ai gjendet në paraburgim, duke tentuar të kuptojnë arsyen pse i dyshuari erdhi deri tek këto sjellje.
Të dyja gratë myslimane janë larguar nga vendi i ngjarjes, ndërkaq policia ende nuk ka arritur të bie në kontakt me ato, përgatiti Koha. (b.an)
