Kosova synon të ndërtojë një kombëtare të fortë, pas pranimit në UEFA, për të garuar denjësisht në eliminatoret evropiane e botërore, por pa sabotuar Kombëtaren e Shqipërisë.
Këtë e ka bërë të ditur vetë ndihmëstrajneri i Kosovës, Muharrem Sahiti, i cili shprehet se Federata Kosovare, FFK, ka vendosur që të mos thërrasë asnjë nga lojtarët me origjinë kosovare që aktualisht janë aktivë me kuqezinjtë apo që figurojnë në listën e federimeve të dërguar në UEFA nga FSHF.
“Nuk do t’i prekim kombëtaret e tjera, sidomos atë të Shqipërisë. Është vendim i marrë nga FFK, që do të thërrasim ata lojtarë që nuk mund të luajnë me Shqipërinë, për shembull Adnan Januzajn”, tha Sahiti në emisionin FanZone në Supersport.
Sahiti është shprehur se nuk shqetësohet për mungesë cilësie, duke thënë se ka lojtarë mjaftueshëm për të formuar dy kombëtare të forta.
Lidhur me kundërshtimet e atyre që nuk duan dy kombëtare, por vetëm një, Sahiti tha se ky është realiteti që duhet pranuar.
“Nuk duhet ta ngatërrojmë sportin me patriotizmin. Ndarja është diçka që dhemb, por ja që tani jemi dy shtete dhe kështu duhet të funksionojmë si dy shtete, si në çdo aspekt tjetër”, tha Sahiti.
D. Ikonomi
