Sezoni 2015-16 nuk është mbyllur ende, por ndërkohë Bayern i Munihut ka nisur sulmin për sezonin e ardhshëm, duke bërë brenda ditës dy goditje të rrufeshme në merkato. Klubi ka njoftuar blerjen e qendërmbrojtësit të kombëtares gjermane, Matts Hummels, nga Borussia Dortmund, si dhe të mesfushorit portugez të Benficas, Renato Sanches. Kjo e dyta sidomos ishte krejtësisht e papritur, përveçse një goditje e madhe për të ardhmen.
Sanches, i ditëlindjes 1997, cilësohet si një nga lojtarët më të mirë në botë për brezin e tij dhe shkëlqeu kundër bavarezëve në dy ndeshjet e Champions League. Deri dje mendohej se do të shkonte te Manchester United, por sot kreu vizitat mjekësore dhe firmosi me bavarezët për pesë vjet. Bayern pagoi 35 milionë euro për kartonin e tij, plus bonuse në varësi të arritjes së objektivave.
Për pesë vjet ka firmosur edhe Hummels, i cili kthehet në Munih pas 8 vjetësh e gjysmë në Dortmund.
D.Ikonomi
