Policia e Durrësit ka proceduar penalisht në gjendje të lirë biznesmenin Leonard Koka, nën akuzën “mosbindje ndaj urdhrit të punonjësit të policisë së rendit publik”.
Ngjarja ka ndodhur në lagjen 1 të qytetit bregdetar kur gjatë kryerjes veprimeve të punonjësve të policisë për kontrollin e mjetit, 49 vjeçari Koka është larguar duke marrë mjetin e tij tip Mercedes Benz me targa AA 911 LB pa iu bindur thirrjes së punonjësve të policisë për të ndaluar.
Më pas, shërbimet kanë ndërhyrë duke e shoqëruar në Komisariatin e Policisë bashkë me mjetin ku u kryen veprimet e duhura proçeduriale dhe u la i lirë.
Në legjislacionin penal shqiptar, mosbindja ndaj urdhrave të ligjshme të punonjësit të policisë së rendit publik përbën kundërvajtje penale dhe në rast fajësie dënohet me gjobë ose me burgim deri në tre muaj.
Njoftimi i policisë
Nga Specialistët për Krimet në Komisariatin e Policisë Durrës, filloi proçedimi penal në gjendje të lirë ndaj shtetasit:
Leonard Koka 49 vjeç, banues në Durrës, pasi:
Më datë 06.10.2015 në lagjen Nr.1 në Durrës gjatë kryerjes veprimeve të punonjësve të policisë për kontrollin e mjetit të tij tip Benz me targa AA 911 LB është larguar duke marrë mjetin dhe nuk i është bindur thirrjes së punonjësve të policisë për të ndaluar.
Shtetasi i mësipërm është shoqëruar në ambjentet e Komisariatit të Policisë Durrës bashkë me mjetin e tij ku u kryen të gjitha veprimet e duhura proçeduriale.
Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale”Mosbindja ndaj urdhërit të punonjësit të policisë të rendit publik”parashikuar në nenin 242 të Kodit Penal.
