Dy anije peshkimi kanë humbur kontaktin që dje me pikën e kontrollit në portin e Durrësit.
Autoritetet kanë bërë të ditur se janë anijet “Çelepia” dhe “Qamili”, secila me 3-4 anëtarë ekuipazhi në bord.
Njoftimi për humbjen e kontakteve është bërë nga pronari i “Çelepias”
Anija “Qamili” është arritur të identifikohet ndërsa peshkon në grykëderdhjen e Bunës, por anëtarët e ekuipazhit të saj kanë humbur kontaktet me dispecerinë e peshkimit në Durrës.
Situata paraqitet më e paqartë për anijen tjetër “Çelepia”, vendndodhja e të cilës nuk është lokalizuar ende. Sakaq, kapitaneria e portit të Durrësit dyshon se ka dalë në ujërat egjiptiane. Dyshohet se një marinar egjiptian, që ishte në bord i ka dhënë drejtim në atë krah. Kapiteni Pavlin Ndreu thotë se: “Dyshojmë se “Çelepia” ka dalë në Egjipt”.
Duket si një përsëritje e filmit “Dueli i heshtur”, veçse me kah të kundërt, ku marinari Skënder, i luajtur nga Rikard Ljarja, i vetëm kundër tre, arriti të merrte kontrollin e anijes dhe ta kthente në portin e Durrësit.
Babai i motoristit Luan Mema i anijes “Çelepia”, thotë se anijet kanë 5 ditë që kanë dalë në det, ndërsa apelon që shteti t’i gjejë. “I bëj thirrje shtetit të gjejë anijet, jemi të shqetësuar”, apelon Lulzim Mema.
“Djali im ka dy vite që merret me peshkim. Kam folur me të në telefon. Jam në merak shumë. Në bord ishte kapiteni, një egjiptian dhe im bir”, tha babai i Luanit.
Bujar Bala, kryedispeçer i peshkimit pohoi për ‘News24’ se anija ‘Çelepia’ nuk ka lokalizues, ndërsa theksoi se kontakti i fundit me ‘Qamilin’ ishte dje në mëngjes.
Nëse nuk vendoset kontakti, pritet që dispeceria e peshkimit ne Durres te nisë kërkimin.
D.I.
