“Prokuroria paraqiti një pretendim mjeran pasi prej vitesh janë bërë të ditura faktet pse duhet rihapur çështja e Azem Hajdarit”.
Kështu deklaroi miku i Izet Haxhisë, Romeo Kara, para mediave, në përfundim të prezantimit të palëve në Gjykatë.
Izet Haxhia ka kërkuar sot të përballet me Sali Berishën. Ai u shpreh se nuk ka dashur kurrë t’i shmanget drejtësisë.
“Denoncuesi dhe akuzuesi im Sali Berisha ka një marrëveshje të bërë në “Rogner” për të ekzekutuar disa persona. Mes tyre edhe mua. Disa i vranë, mua jo” – ka deklaruar Izeti përpara trupës gjykuese, duke folur për një plan të gjerë ekzekutimesh të cilat sipas tij mbajnë autorësinë e ish-kryeministrit Sali Berisha.
***
Trupa gjykuese kryesohet nga gjyqtari Besnik Hoxha, i cili është bërë i njohur për gjyqin e 21 Janarit pasi shpalli të pafajshëm gardistët që vranë 4 protestuesit e opozitës në Bulevardin “Dëshmorët e Kombit”.
Ai ka gjykuar edhe çështjen “Gërdeci” ku humbën jetën 26 persona nga shpërthimi i fabrikave të demontimit të armëve.
Në këtë proces, Izet Haxhia mbrohet nga avokati Bashkim Nikolla, ndërsa pala e akuzës nga Prokurori Petrit Bici.
Ndërkohë në seancën gjyqësore merr pjesë edhe një nga familjarët e Izet Haxhisë, Ismet Haxhia, si dhe miku i tij, Romeo Kara, ish-avokat i OSHEE-së i cili ka denoncuar skandalin e privatizimit të OSSH te çekët e CEZ-it. Për dënimin në mungesë ndaj Izet Haxhisë, Gjykata e Strasburgut ka vlerësuar se procesi ndaj Izetit ka pasur parregullsi.
Ish-shoqëruesi i Sali Berishës pritet të dalë sërish në gjyq më 14 qershor. /javanews/b.d
