Zbardhet opinioni i Partisë Demokratike, që do t’i bashkëngjitet draftit përfundimtar të reformës në drejtësi dhe që do të niset drejt Komisionit të Venecias. Bëhet me dije se janë 42 vërejtje, në 73 faqe material, që demokratët kanë listuar si kundërshti me draftin e ekspertëve dhe të përkrahur nga socialistët. Po kështu, edhe LSI-ja do të ketë opinionin e saj bashkëngjitur draftit final.
PD-ja shënon në këtë draft se mazhoranca ka deformuar mendimet e ‘Venecias’. Kështu, opozita argumenton mendimin e saj, se emërimi i anëtarëve të Gjykatës Kushtetuese duhet bërë me 2/3 dhe jo me 3/5, të cilën e quajnë një formulë çimentimi dhe kapjeje politike të sistemit, për vetë faktin se mazhoranca i ka 84 votat e sigurta, ose thënë ndryshe 3/5.
Në raport theksohet se ky shqetësim është evidentuar edhe në rekomandimet e ‘Venecias’, por ekspertët e Partisë Socialiste nuk e kanë reflektuar. Skema aktuale e krijimit të institucioneve, sipas demokratëve është e komplikuar dhe sjell mbivendosje të kompetencave raporton “News 24”.
Ekspertët e Partisë Demokratike, kritikojnë parashikimet për ndërprerjen e mandatit të funksionarëve të lartë në sistemin e drejtësisë. Drafti parashikon ndërprerjen e mandatit të Prokurorit të Përgjithshëm, ndërkohë që vetë ‘Venecia’, zëvendësimin e tij nuk e sheh të domosdoshëm. Ekspertët demokratë nuk bien dakord edhe mbi rolin e presidentit në emërimin e gjyqtarëve.
Sipas tyre, është deformuar komenti i Komisionit të Venecias për këtë çështje, duke e zhveshur presidentin nga çdo kompetencë. Një tjetër mendim i PD-së, është se në këtë opinion kritikohet mosreflektimi i Komisionit të Venecias për ngritjen e Gjykatës së lartë Administrative, duke argumentuar se vetë ekspertiza europiane e 21 dhjetorit e ka kundërshtuar këtë institucion, për shkak se Shqipëria nuk i ka burimet e mjaftueshme njerëzore dhe financiare.
“Shqetësimet tona nuk kanë të bëjnë me pozicionin e tanishëm politik (si opozita e vendit), por nga anomalitë që kanë pas sjell gjendjen aktuale të sistemit të drejtësisë, ku ndërhyrja/ndikimet politike, ka qenë padyshim një nga shkaqet kryesore. Ne shprehim besimin e plotë se ky Opinion do të ndihmojë në pasqyrimin e realitetit që ekziston aktualisht në Shqipëri dhe do të jap kontributin e tij në gjetjen e zgjidhjeve më të mira për reformimin e sistemit të drejtësisë. Do të kishim dëshiruar që Opinioni ynë mbi amendamentet kushtetuese të ishte marrë në shqyrtim dhe vlerësim paraprakisht nga autoritetet vendase, me synimin e gjetjes së zgjidhjeve më të mira të përbashkëta dhe realizimit të një procesi gjithëpërfshirës, konsensual dhe transparent. Por përjashtimi de facto i mundësisë për konsensus nga ana e mazhorancës, na detyron që këtë Opinion t’ia paraqesim drejtpërdrejtë Komisionit të Venecias. Ne presim veçanërisht elaborimin nga ana juaj të standardit të përpunuar tashmë gjerësisht nga ana juaj në shumë Opinione, mbi rolin e opozitës parlamentare, si një filtër balancues dhe kontrollues, në procesin e emërimit në organet e pavarura të sistemit të drejtësisë. Duke gjetur rastin edhe njëherë për të falenderuar Komisionin e Venecias për kontributin e jashtëzakonshëm në forcimin e demokracisë në Shqipëri;”- theksohet në materialin e PD./Balkanweb
