Kryeministri i vendit Edi Rama përsëriti thirrjet në drejtim të opozitës për tu ulur në tryezë për të gjetur dakortëdinë për reformën në drejtësi. Rama ftoi opozitën për dialog, madje propozoi mbajtjen e një tryeze të nivelit të lartë mes përfaqësuesve të mazhorancës dhe opozitës. Këtë deklaratë ai i dha gjatë konferencës për shtyp me Komisionerin Hahn.
“Konfirmuam vullnetin për dialog me opozitën në Komisionin e Reformës, i cili nuk mund të kushtëzohet nga aspekte të politikës së ditës sado legjitime qofshin ato për një palë apo palë tjetër. Ftoj PD të ulemi në një tryezë të nivelit të lartë politik mes nesh, dhe jemi të gatshëm ta dëgjojmë me vëmendje dhe respekt PD, sepse besoj se ekziston mundësia që të biem dakord që mosdakordësitë tona ti trajtojmë në mënyrë të zgjuar. Besoj po ashtu se ekziston mundësia ti ndajmë axhendat partiake, apo reformat e një qeverisje, nga axhenda kombëtare. Besojmë se gjuha e kushteve dhe kërcënimeve që janë kthyer në betejë deklaratsh televizive është e drejtë e çdo pale që e zgjedh, por ne ballafaqojmë në tryezë argumentat”, tha Rama.
Ndërkohë Komisioneri Hahn kërkoi nga palët të gjejnë gjuhën e përbashkët për reformën në drejtësi. Ai theksoi se çështja nuk duhet ndërlikuar me kushte.
“Të përqendrohemi te gjërat thelbësore dhe mos të vendosen kushte sepse kjo i ndërlikon gjërat. Mendoj se ka qenë shumë e qartë që për sa i përket reformës duhet të përqendrohemi te ajo reformë dhe mos ti ndërlikojmë gjërat. Ftoj palët të bëjnë edhe kilometrin e fundit drejt reformës”, tha Hahn.
Nga ana e tij, Hahn deklaroi se “prioriteti është një gjyqësor funksional për qytetarët dhe investitorët”, por shtoi se të rëndësishme janë edhe zbatimi i ligjit të dekriminalizimit dhe reformës zgjedhore, “duke qenë se vitin e ardhshëm Shqipëria ka zgjedhje të përgjithshme”.
“Duhet të jemi shumë të qartë që legjislacioni për dekriminalizimin duhet zbatuar shpejt dhe në të gjitha nivelet. Është kyç për sa i përket legjitimitetit të institucioneve”, tha Hahn.
Ndërkohë sa i takon reformës zgjedhore kryeministri Rama tha se mazhoranca është e hapur ndaj çdo sugjerimi nga opozita. Ai tha se mund ta bëjnë edhe të vetëm pasi numrat në Parlament i kanë, por shtoi se nuk mund të bëhet në mënyrë të njëanshme.
“Vijat e kuqe, janë vija në rërë që i merr dallga e parë. Kemi thënë që ditën e parë që do dëgjojmë opozitën për çdo gjë dhe të vendosim së bashku mbi rekomandimet e OSBE-ODHIR. Do t’i garantojmë opozitës standarte edhe më të larta në mënyrën që humbjen për zgjedhjet e ardhshme ta kthejnë në forcë”, tha më tej Rama.
