Komisioni i posaçëm parlamentar për reformën në drejtësi pritet të mblidhet paraditen e së premtes për të miratuar draftin e rishikuar te ndryshimeve kushtetuese, i hartuar nga grupi i ekspertëve të nivelit të lartë, i cili do t’i përcillet për ekspertizë Komisionit të Venecias.
Ky draft mendohet të jetë i vetmi dokument që do të kalojë në komision, ndonëse në media u bë publik dhe një tjetër draft i Ministrisë së Drejtësisë, për të cilin ekspertët e lartë thanë se e kanë përfshirë në projektin e tyre final.
Paketa e ndryshimeve kushtetuese, e rishikuar mbi bazën e rekomandimeve të Komisionit të Venecias, nuk u pranua nga opozita, për shkak të qëndrimeve të kundërta lidhur me shumicën në votimin e drejtuesve të institucioneve të larta të drejtësisë.
Drafti i ekspertëve parashikon votimin me shumicë të cilësuar(3/5), ndërsa ekspertët e PD-së i qëndrojnë variantit për shumicë kushtetuese 2/3-a. Sipas tyre vota me 3/5 ‘çimenton kapjen e sistemit të drejtësisë’.
