SPECIALE JAVANEWS/ Çështja e Këshillit të Lartë të Drejtësisë, i cili do të quhet Këshilli i Lartë Gjyqësor, sipas draftit për reformën në drejtësi, duket se është një nga pikat më të nxehta të përplasjeve mes mazhorancës dhe opozitës në komisionin parlamentar të reformës. Janë pikërisht mosmarrëveshjet për mandatin e anëtarëve të këshilltarëve aktual të drejtësis, si dhe procedurat për emërimin e anëtarëve të tjerë të këtij Këshilli, ato të cilat kanë bërë që PD të bojkotojë sërish punën në këtë komision. Ndonëse ishte rënë dakord që palët të shkojnë me propozime alternative, PD-ja duket se ka zgjedhur sërish të braktisë konsensusin e arritur dhe me ndërmjetësimin ndërkombëtar, duke mos e pranuar më formulën e propozimeve alternative, por bojkotimin e komisionit. Reforma në thelb parashikon rikompozimin e KLD-së dhe ngritjen e tre institucioneve të reja: këshillin e emërimeve në drejtësi, tribunalin disiplinor dhe inspektoriatin e lartë të drejtësisë. Projektligji parashikon që Këshilli i Lartë Gjyqësor, (KLGJ), të ketë 11 anëtarë, ku gjashtë do të zgjidhen nga gjyqtarët e të gjitha niveleve dhe 5 të tjerët nga Kuvendi, brenda radhëve të juristëve jo-gjyqtarë. Secili prej anëtarëve të KLGJ duhet të marrë 3/5 e votave të Kuvendit, pas një procesi përzgjedhjeje që përfshin komunitetin e avokatëve, të noterëve, trupën e pedagogëve, shkollën e magjistraturës dhe shoqërinë civile. Secila prej këtyre kategorive do të përfaqësohet nga 1 anëtar në KLGJ, ndërkohë që kryetari i këtij Këshilli parashikohet të zgjidhet nga votimi i të gjithë anëtarëve. Mandati i anëtarëve aktualë të KLD-së digjet 3 muaj pas hyrjes në fuqi të ligjit. Në të njëjtën periudhë, paketa e ndryshimeve kushtetuese parashikon zgjedhjen e anëtarëve të rinj të Këshillit të Lartë Gjyqësor. Por burime të besueshme brenda PD-së bëjnë të ditur për Javanews se kjo forcë politike këmbëngul se nuk është e gatshme të pranojë që anëtarët e KLGJ të zgjidhen me ¾ e votave në Kuvend, por me 93 vota, që përbën një shumicë kushtetuese. Kjo ka bërë që PD të tërhiqet nga komisioni i ekspertëve në përpjekje për të arritur paraprakisht një akord politik jashtë tryezës së ekspertëve jo vetëm për KLGJ, por edhe për mekanizmat zhbllokues në rast se nuk arrihet konsensusi mes palëve për emërimet në nivelet e larta të drejtësis.
(javanews.al) Me. Ar
