“Drafti” i PD, si arsye për vazhdimin e bojkotit

Nga ARTUR AJAZI

Ish-opozita e vjetër, ka deklaruar se ka “gati draftin e Reformës Zgjedhore” për të hequr dorë nga kushtet e tjera të saj, duke ripërsëritur vetveten. Pas një takimi rutinë me aleatët e tij tranzitorë, Lulzim Basha ka deklaruar se “së shpejti opozita, do të bëjë publike propozimet e veta për Reformën Zgjedhore, duke synuar t’i hapë rrugë një debati publik”.

Pra shihet qartë se duke prezantuar propozimet e tij, Lulzim Basha po kërkon të shpalosë angazhimin e PD përballë asaj që ai e quan “mungesë e vullnetit politik të Ramës”. Opozita në fakt ka dy propozime, përsa i përket edhe financimit të partive, duke kërkuar që financimi i tyre, të jetë 100 per qind nga shteti, pasi sipas SHQUP-it, “kjo formulë heq varësinë e partive nga oligarkët dhe kriminelët”.

Duket më tepër stimuluese dhe kaotike, se sa pjesë e propozimeve konkrete nga ish-opozita. Por ndërkohë aleatët tranzitorë të Lulzimit, kërkojnë që të ketë një formulë tjetër, dhe se “financimi i partive të bëhet nga shteti dhe subjektet private”, duke caktuar, masën e vlerës së dhënë prej tyre. Është pikërisht kjo pikë që po diskutohet këto ditë nga aleatët e Lulzimit, nga ku ka patur dhe kundërshtime.

Kështu Nard Ndoka e ka korrigjuar Lulzimin, (i vetmi që shpesh dek kundër tij) duke u shprehur se “ndryshimi i sistemit zgjedhor është lënë që të diskutohet në një moment të dytë, ndaj nuk duhet të ketë pazar midis dy partive të mëdha”. Por është e rëndësishme të kuptohet se ish-opozita nuk është e hapur për përmirësimin e sistemit, për shkak të krizës brënda saj. Shihet qartë se konsensusi mes shumicës qeverisëse dhe parlamentare dhe ish-opozitës, nuk ka gjasa të arrihet, (por edhe kur ka ekzistuar ka qenë i çalë) dhe kjo për shkak të pengesave që vinin dhe vijnë edhe sot nga PD.

Mungesa e vullnetit politik nga ana e ish-opozitës, për t’u dhënë zgjidhje problemeve zgjedhore, ka bërë që besimi te zgjedhjet të jetë përherë e më i cunguar nga ana e saj, ndaj është e rëndësishme që të rivendoset vullneti politik, të nisë reforma zgjedhore, hartimi dhe miratimi i saj. Por duke i rënë të njëjtës daulle, shefi demokratëve dhe shefi aleatëve opozitaristë, deklaron se “Rama po e pengon Reformën Zgjedhore dhe zbatimin e saj, pasi ka shtyrë me 3 muaj gjendjen e jashtëzakonshnme”.

Duke mos patur fare përqëndrim mbi situatën politike dhe sociale, dhe duke shtyrë muajt dhe vitet me “propozime” imagjinare për “dy palë zgjedhje të lira në një ditë”, duket se udhëheqësi në detyrë i selisë blu, po kërkon një shkak për të justifikuar kotësinë dhe boshllëkun brënda PD.

Rikthimi në propozime dhe drafte, thjesht po kërkon të tërheqë vëmëndjen nga “dimri i acartë” që po afrohet për ish-opozitën më destruktive që ka patur ndonjëherë ky vend. Po kërkon të tërheqë vëmëndjen nga skandalet e babaleve, bojkotin dhe djegien e mandateve, bojkoti zgjedhjeve, aferat e rihetuara të CEZ, apo dhe dosjeve të vjetra që pritet ti rihapë SPAK.

Draftet e propozimet e SHQUP-it, janë zbukurime për mashtrimet e rradhës, shkaqe për bojkotin e rradhës, janë mburojë për kastën e korruptuar të atyre që sot drejtojnë jo vetëm PD, por dhe partiçkat e aleatëve tranzitorë të saj.