Lufta e gjatë mediatike ka bërë që shoqëria të hyjë në rrugën e ndërgjegjësimit. Deklarata erdhi nga Shefja e Shërbimit pranë Senatoriumit të Tiranës, Silvana Bala.
E ftuar në studion e emisionit ‘Java në RTSH’, Bala dha detaje edhe nga spitali i dytë që mund të vihet në dispozicion nëse numri i të prekurve nga COVID-19 rritet.
“Spitali i dytë do të jetë gati nëse Infektivi plotësohet me pacientë. Unë ju siguroj se përshtatja e tij do të bëhet sipas të gjitha protokolleve të Organizatës Botërore të Shëndetësisë. Aty nuk do të mungojnë as trajtimet dhe as nuk do te ketë vonesë në diagnostikime” – tha Bala referuar spitalit ‘Shefqet Ndroqi’.
Ajo shtoi se stafi spitalor është i përgatitur për të pritur të sëmurë me koronavirus. Bala konfirmoi për “Java në RTSH” se dita-ditës pritet instalimi i respiratorëve të rinj.
Dr. Silvana Bala pati edhe një paralajmërim. Ajo tha se nëse nuk ndërpritet zinxhiri, sëmundja në fjalë mund të na çojë në fatalitet.
“Ne e pamë se çfarë ndodhi në Itali, ku nuk e besuan sesa katastrofik do të ishte ky virus. Duhet kuptuar se ky është një virus ndryshe nga sëmundjet apo virozat e zakonshme të dimrit. Sot nga Italia ne dëgjojmë shifra alarmante. Fal Zotit ne kemi vetëm dy vdekje dhe uroj që të mbetemi tek kjo shifër. Numri i ulët i vdekjeve është padyshim një sukses i shëndetësisë” – tha Bala në studion e emisionit “Java në RTSH”.
