Komisioni i Etikës në Federatën e Futbollit ka programuar javën e ardhshme një mbledhje ku tematika e rendit të ditës do të jetë marrja në shqyrtim e dosjes “Skënderbeu”. Sipas “Supersport”, bëhet fjalë për çështjen e dënimit 1 vjeçar që i‘u dha nga UEFA klubit korçar për trukim ndeshjesh.
Mësohet se ky komision ka marrë në dispozicion edhe vendimin e zbardhur të KAS, Gjykatës së Arbitrazhit Sportiv në Lozanë si instanca më e lartë e drejtësisë sportive e cila la në fuqi dënimin e UEFA-s, duke disponuar të gjithë dokumentacionin e nevojshëm për të marrë në shqyrtim çështjen.
Tani “topi” i ka kaluar drejtësisë sportive në vend dhe do të jetë ajo që do të thotë fjalën e fundit në lidhje me çështjen Skënderbeu. Ky komision do të shqyrtoje me vëmendje të gjitha provat që ka në dispozicion dhe shumë shpejt do të bëjë publik dhe vendimin. 
Hetimi për klubin korçar nga Etika ka nisur rreth dy muaj më parë, kur UEFA deklaroi se për Skënderbeun mund të kishte një tjetër dënim, madje më të rëndë se ai i verës së shkuar./a.ç
