Ndarja nga jeta në 5 janar 2012 të Prokurorit të Krimeve të Rënda, Xhevat Hana u shoqërua me një pikëpyetje të madhe për shkak se familjarët e tij ngritën menjëherë dyshimin se vdekja e të afërmit të tyre mund të kishte ndodhur si pasojë e një helmimi të mundshëm dhe jo për shkak të një sëmundjeje të pashërueshme siç është raportuar zyrtarisht.
Edhe pse kanë kaluar 7 vite nga ndarja nga jeta e prokurorit, sërish rrethanat nuk janë sqaruar siç duhet. Ka qenë vëllai i Xhevat Hanës, Selami Hana, i cili e ka kthyer edhe një herë në vëmendje vdekjen e prokurorit, duke shkruar se ai u vra nga dora e zezë dhe krimi.
“Perkujtimore nga vellezrit dhe motrat.7 vjet qe te ndane padrejtesisht nga jeta ne krye te detyres vellai yne i shtrenjti Xhevat Dora e zeze dhe kriminale te preu ne mes Drejtesia per ty po vonon”, shkruan Selami Hana në një postim në Facebook.
KUSH ISHTE XHEVAT HANA
Xhevat Hana ishte edhe prokurori i dosjes tjetër, atë të rrëmbimit, torturimit dhe zhdukjes pa gjurmë të Remzi Hoxhës, çështje që ka implikuar direkt Shërbimin sekret të viteve ‘90, të drejtuar nga Bashkim Gazidede. Madje ishte pikërishtë Hana që kërkoi ekstradimin e Ilir Kumbaros nga Anglia.
Xhevat Hana ishte një nga prokurorët më të njohur të Shqipërisë, me një karrierë të gjatë në drejtësi, për disa kohë dhe si këshilltar i presidentit Alfred Moisiu. Gjatë vitit 2011 ai qëndroi i shtruar për një kohë të gjatë në një spital publik të Tiranës, por familjarët u detyruan ta transportonin në Itali për shkak të përkeqësimit të gjendjes shëndetësore, ku edhe ndërroi jetë në 5 janar 2012./a.meta
