Gjykata e Krimeve të Rënda ka vendosur burg për imamët e vetëshpallur, i njohur si gjyqi ndaj xhihadistëve shqiptarë. Vendimi është dhënë këtë pasdite dhe në total janë dhënë 126 vite burgim për 9 persona.
Madje gjatë gjyqit të dënuarit janë irrituar me vendimin duke folur e përmendur edhe terma në gjuhën e Kuranit. Ata i janë drejtuar trupit gjykues me këto fjalë: “Shumë shpejt ju keni për ta marrë dënimin”.
Mbështetësit e të dënuarve kanë kërcënuar jashtë gjykatës edhe gazetarët dhe kameramanët që të mos filmonin. Është dashur ndërhyrja e forcave të Shqiponjës që të normalizojnë situatën.
Ja dënimet e dhëna nga trupa gjykuese:
Verdi Morava 13 vjet
Zeqir Imeri 16 vjet
Gerti Pashko 17 vjet
Bujar Hysa 18 vjet
Genci Balla 17 vjet
Orion Reci 13 vite
Fadil Muslimani 12 vjet
Astrit Tola 7 vjet
Edmond Balla 13 vjet
Në një prononcim për median njëri prej avokatëve të të dënuarëve ka thënë se vendimi do të ankimohet, duke shtuar se ishte një vendim i turpshëm.
“Nuk do ta bëjmë ankimimin natën sic dha dhe vendimin kjo gjykatë… ky vendim është i turpshëm për Shqipërinë. Ky është një vendim kundër ndërgjegjes, kundër besimit!”- tha avokati i Orion Reçit.
