Tre ditët e çudisë kaluan, u konsumua i gjithë skenari herë horror, herë i çmendur e herë-herë gati-gati politik i të quajturës dosja Doshi dhe tani duket se të gjithë kërkojnë që kjo çështje të harrohet sa më shpejt. Së paku duke larë duart nga një histori që më shumë se vetë personazhet e përfshirë në të, bëri pis gjithë skenën politike shqiptare. Që e dëshmoi atë sa meskine, sa e paaftë, sa e papërfaqësuar intelektualisht është ajo në tërësinë e saj. Sot, kur Gjykata e Lartë, i rijep lirinë Tom Doshit, kuptohet se duke i hapur derën e shtëpisë së tij ku ai ndodhej në arrest, në fakt, ka dëshmuar se deputeti ka humbur çelësin për në portën e politikës. Më shumë se ai vetë edhe kolegu tjetër i tij Mark Froku, nën akuza të shumëfishta tashmë dhe mbas tyre, edhe të tjerë, me emra që përmenden me gjysmë zëri, që në një mënyrë apo një tjetër, do të jenë jashtë politikës. Aty ku i ftuan të hyjnë me bujë dhe tani po i nxjerrin si bezdi e të gjithëve, ndonëse jo më gjithë zemër.
Të gjithë tashmë presin epilogun e kësaj historie. Ose më saktë, presin që ajo të arkivohet sa më shpejt. Teknologjia e zakonshme e Tiranës, sa më e madhe dhe sa më e pabesueshme të jetë çudia, aq më shumë ka gjasa të besohet, në këtë rast u verifikua në vetëm pak ditë, atëherë edhe kur shpërtheu skandali. I vetmi organizëm që të paktën zyrtarisht bëri sikur e besoi, ishte opozita shqiptare. PD bëri hap mbas hapi çdo hap të gabuar politik duke mbetur në fund të kësaj historie, e humbura e vërtetë e saj. Ajo e konsideroi kryetarin e kuvendit vrasës, ndërkohë që dy deputetët ishin natyrisht të gjallë e në jetë; ajo zgjodhi mes dy deputetëve që më pas u arrestuan dhe ish-aleatit të saj në qeverisje, dy të parët; ajo kërkoi të trondisë maxhorancën me protesta të përditshme që nuk ndezën as në Tiranë shkëndijën e mekur të opozitarizmit dhe është humbësja e vërtetë morale e kësaj historie. Edhe pse karta e dekriminalizimit të kuvendit dhe politikës në përgjithësi, ishte një nga kartat më të forta morale të saj. Sot, për shumëkënd, ajo, opozita, në mënyrë të çuditshme do të paguajë koston e mungesës së sinqeritetit të saj, të veprimeve të dyfishta dhe aleancave të dyshimta që ajo bën, sipas shprehjes së vjetër: edhe me djallin bëhemi kundër të majtëve! Zgjedhjet lokale që janë në prag, do të shpjegojnë në javën e fundit të qershorit, sesi e kanë parë shqiptarët çfarë ndodhi në mars. Sepse edhe kësaj rradhe, në zgjedhjet për administratorë lokalë, shqiptarët do të votojnë politikisht.
Redaksia Online
(JavaNews.al)
