Deputeti i përjashtuar nga Partia Socialiste Tom Doshi ka vijuar me akuzat e tij në drejtim të kreut të Kuvendit Ilir Meta se po blen vota në të gjithë vendin. Por akuzave të Doshit nuk i ka shpëtuar as kryetari i Partisë Socialiste Edi Rama se po shkatërron këtë forcë politike.
Përmes një postimi të bërë në rrjetet sociale, Doshi shprehet se Meta po punon kundër kandidatëve të mazhorancës në ato zona ku nuk janë kandidatët e propozuar nga LSI.
Sipas Doshit këtë gjë Meta po e bën edhe në Tiranë që po punon kundër Erjon Veliajt.
“E deklarova se, nëse ndonjë kandidat i PS në qarkun e Shkodrës do më kërkonte mbështetje, unë do ta mbështesja. i vetmi kandidat që më kërkoi mbështetje ishte Gjokë Lleshi që unë po e mbështes. Megjithëse, për këtë kandidat, Ilir Meta dhe disa deputetë të PS në Qarkun e Shkodrës mendonin se nuk ka mbështetje dhe kandidati që sot është me siglën e PD, i përket LSI. Të njëjtën gjë, po bën në të gjithë Shqipërinë, sidomos në Tiranë. Po blen vota për partinë e tij dhe po punojnë kundër për kandidatin Erion Veliaj. Kjo është përgjegjësia e Edi Ramës, i cili po shkatërron Partinë Socialiste për Ilir Metën”, shkruan Doshi.
