Mesditën e sotme policia zbardhi ngjarjen e ndodhur mesnatën e të enjtes në Sarandë ku mbetën të plagosur dy të rinj.
Një prej të plagosurve i identifikuar si Alban Baxheri, ndodhet në gjendje më të rëndë, pasi mori një goditje me thikë në gjoks.
Për këtë shkak ai u dërgua me urgjencë në drejtim të spitalit të Janinës.
I plagosuri tjetër ndodhet në spitalin e Sarandës jashtë rrezikut për jetën. Ende nuk dihen motivet e krimit, ndërsa policia dyshon paraprakisht për një krim pas një grindjeje të momentit.
Të dyshuar për ngjarjen, policia shoqëroi tre persona të cilët tashmë po merren në pyetje. Ende nuk është vendosur një masë ndalimi për të dyshuarit, pasi pritet konsultimi me prokurorinë.
Njoftimi i Policisë Sarandë:
Më datë 17.08.2017, rreth orës 23:30, në Sallën Operative Sarandë ka ardhur një njoftim se në lagjen “Nr.1”, pranë gjykatës, janë duke u konfliktuar fizikisht, disa shtetas.
Policia ka shkuar në vendngjarje ku ka konstatuar se ishin konfliktuar me sende të forta, për motive të dobëta, shtetasit A.L., A.S dhe F.T., me shtetasin A.B.
Në momentin kur kanë mbritur shërbimet e Policisë, në vendngjarje Policia ka konstatuar shtetasit A.L, F.T dhe A.B.
Ndërsa shtetasi A.S., ishte larguar nga vendi i ngjarjes me automjet dhe gjatë largimit ka dëmtuar edhe disa automjete të tjera.
Si pasojë e konfliktit ishte dëmtuar dhe u dërgua në spital jashtë rrezikut për jetën shtetasi A.L.
Ndërsa shtetasi A.B ka marrë dëmtime të rënda dhe është transportuar për ndihmë mjekësore më të specializuar në Spitalin e Janinës.
Specialistët për Hetimin e Krimeve në Komisariatin e Policisë Sarandë kanë bërë zbardhjen dhe dokumentimin e ngjarjes, si dhe kapjen e ndalimin e shtetasit Albjon.S., i cili ishte larguar nga vendi i ngjarjes.
Gjatë kontrollit që policia ka ushtruar në banesën e këtij shtetasi, i janë gjetur dhe sekuestruar në cilësinë e provës materiale një armë zjarri me 5 fishekë, dhe një armë e ftohtë (dorëzë dore).
Në përfundim të veprimeve të para u bë arrestimi në flagrancë i shtetasve:
Adriatik L, 18 vjeç, banues në Sarandë, për veprën penale ”Plagosje e rëndë me dashje”,
Flavio T, 21 vjeç, banues në Fier, për veprën penale ”Plagosje e rëndë me dashje”,
Arben B, 32 vjeç, banues në Sarandë, për veprën penale ”Plagosje e lehtë me dashje”, dhe
Albjon S, 24 vjeç, për veprën penale ”Plagosje e rëndë me dashje”, ”Prodhimi dhe mbajtja pa leje e armëve dhe municionit”, ”Prodhimi, mbajtja, blerja apo shitja pa leje e armëve të ftohta” dhe ”Shkatërrim i pronës”, të parashikuara nga nenet 88, 89, 150, 278 dhe 279 të Kodit Penal.
a.ç
