Kryeministri Edi Rama shkarkoi sot ministrin e Financave, Shkëlqim Cani.
Sipas njoftimit për shtyp të shpërndarë nga Kryeministria, Rama i shprehu sot Ministrit të Financave Shkëlqim Cani, falënderimet e tij për angazhimin, profesionalizmin dhe integritetin e plotë në kryerjen e njërës prej detyrave më të vështira qeverisëse të këtij mandati.
Cani ishte i vetmi anëtar i qeverisë, i cili nuk e kishte dhënë dorëheqjen nga mandati i deputetit, ç’ka do të thotë se ai do të vijojë të jetë pjesë e Kuvendit.
Mësohet se kryeministri Rama ka falenderuar Canin për kontributin e tij në kapërcimin e situatës së vështirë financiare. Ai pritet të zëvendësohet nga Arben Ahmetaj ndërsa vendin e këtij të fundit do ta zërë Milva Ekonomi.
Njoftimi i Kryeministrisë
Kryeministri Edi Rama i shprehu sot Ministrit të Financave Shkëlqim Cani, falënderimet e tij për angazhimin, profesionalizmin dhe integritetin e plotë në kryerjen e njërës prej detyrave më të vështira qeverisëse të këtij mandati.
Kryeministri e informoi ministrin Cani për vendimin e zëvendësimit të tij me një koleg tjetër dhe i kërkoi vazhdimin e angazhimit të tij, me të njëjtin profesionalizëm e përkushtim, si deputet i Kuvendit të Shqipërisë dhe anëtar i Komisionit të Ekonomisë e Financave.
Ministri Cani e falënderoi nga ana e tij Kryeministrin për besimin dhe bashkëpunimin e ngushtë në kapërcimin me sukses të situatës së rëndë financiare të trashëguar dy vjet e gjysëm më parë, si edhe e siguroi për vazhdimin me përkushtim të plotë të angazhimit të tij politik e profesional si deputet i Kuvendit të Shqipërisë.
Detyrën e Ministrit të Financave, Kryeministri do t’ia besojë Z. Arben Ahmetaj, ndërsa detyrën e Ministrit të Ekonomisë, Turizmit, Tregtisë dhe Sipërmarrjes do t’ia besojë Znj. Milva Ekonomi.
