Ish anëtari i Këshillit Kombëtar të PD, Edvin Kulluri nëpërmjet një lidhje “skype” ka dhënë një intervistë për Fax News lidhur me tragjedinë e ndodhur në Potam të Himarës, ku një 7 vjeçare ndërroi jetë pasi u godit nga një skaf i drejtuar nga oficeri i policisë, Arjan Tase.
Kulluri tha se problemi qëndronte në faktin se askush nuk mbante përgjegjësi politikisht. Ndërsa shtoi se faji ishte edhe i opozitës pasi sipas tij nuk ka presionuar mjaftueshëm mazhorancën përsa i përket ngjarjeve të ndodhura në vend dhe situatës së vështirë ku ndodhen qytetarët shqiptarë.
Edvin Kulluri: Pas vitit 2013 me ndryshimet e paligjshme të bëra në kupolën e policisë së shtetit, për të mbushur rradhët e tyre me militant ka sjellë këtë lloj papërgjegjshmërie dhe arrogance. Dhjetëra oficerë janë zëvendësuar me njerëz të paditur që ka sjellë mos-zbardhjen e ngjarjeve kriminale në vend.
Përgjegjësia është politike, jo e një individi sepse ai do marrë dënimin që meriton. Por çështja është që këtu nuk ka asnjë reagim politik sepse kjo mazhorancë e ndjen veten të sigurt në pushtet dhe nuk janë kujdesur që të reflektojnë për gjërat që nuk shkojnë mirë. Edhe ndryshimet në qeveri kanë ardhur vetëm për shkak të presionit të ardhshëm dhe prej protestave të studentëve. Por nga sa vjen nga opozita kësaj mazhorance nuk i hyn gjemb në këmbë. Këtu ka përgjegjësi edhe opozita për paaftësinë e saj për të sjellë presion ndaj kësaj mazhorance.
Çështja është e rëndë, këtu po flasim për përgjegjësi politike. Aleati i Ramës ka qenë opozita sepse nuk ka sjellë shpresë për ndryshim në këtë vend./m.j
