Në një kohë kur sot Valbona Sako dha dorëheqje të papritur nga posti i kryetares së Bashkisë së Durrësit, në një moment kur qyteti po përjeton ditët e tij më të këqija, kryeministri Edi Rama ka refuzuar që të komentojë vendimin e saj. teksa është pyeture nga gazetarët në terren në lidhje me dorëheqjen e Sakos, Rama e fokusoi përgjigjen e tij tek situata pas tërmetit.
Mes të tjerash ai i ka cilësuar disa media si një nga ‘gjeneratorët’ e tmerrit, që japin debate dhe kronika televizive që trembin sipas tij qytetarët.
“Ajo që mendoj se është me rëndësi, është që në këto momente të jepni sa më shumë energji pozitive. Mos të merremi me këto histori anësore. Ju jeni heronj në terren, por ata që ju drejtojnë me telefon nga redaksitë dhe të mbledhin në darkë lloj lloj sharlatanët, pasi njerëzit janë të tmerruar.
Një nga gjeneratorët e tmerrit janë ekranet e debateve pa kuptim. Janë ekrane ku jepen kronika sikur në çdo shtëpi ka rënë bomba. Ndaj është misioni juaj që të thoni; nuk ka rëndësi fare nëse ka plasur apo jo muri, por rëndësi ka që; a janë prekur apo jo kolonat? Nëse nuk na ndihmoni, mos na e bëni punën të vështirë duke hedhur helm. I luajtët mëndsh njerëzit. Jo ju që jeni këtu në terren, por përmes ekraneve”, tha Rama.
