Tre persona janë proceduar penalisht nga policia në qarkun e Fierit, pasi dyshohen se kanë nisur zjarret që prej disa ditësh kanë pushtuar zonën.
Bëhet fjalë për vatrat e zjarrit në fshatrat Drenovë, Suk 2 dhe Frakull e Madhe.
“Si rezultat i hetimeve dhe veprimeve të tjera procedurale, të kryera menjëherë pas njoftimeve për vatra zjarri në këto fshatra, shërbimet e komisariateve të Policisë Mallakastër dhe Fier referuan materialet në Prokurori, ku filloi procedimi penal për shtetasit: E. V., 70 vjeç, banues në fshatin Drenovë; Xh. R., 59 vjeç, banues në fshatin Suk 2; R. Ç., 48 vjeçe, banuese në fshatin Frakull e Madhe.”- bën me dije Policia e Fierit.
Sipas hetuesve, dyshohet se tre qytetarët kanë ndezur zjarre në tokat e tyre për djegien e mbeturinave dhe si pasojë e përhapjes së flakëve, janë djegur dhe sipërfaqe pyjore, si dhe sipërfaqe të mbjella me vreshta dhe pemë frutorë.
Kujtojmë se prej ditës së dielë, 13 korrik, një zjarr i fuqishëm ka përfshirë zonën pyjore të Drenovës në Mallakastër. Vatra e zjarrit vijon të jetë aktive, ndërsa në terren ndodhen 30 trupa të ushtrisë, që janë angazhuar përkrah zjarrfikësve dhe forcave bashkiake në përpjekje për të izoluar flakët. Për shkak të terrenit të vështirë, ndërhyrja me mjete zjarrfikëse është e pamundur, ndaj puna po vijon me mjete rrethanore, ndërsa pritet ndërhyrje edhe nga ajri.
