Ndërsa nga dita në ditë po rritet numëri i shqiptarëve që po nisen në Gjermani për të gjetur një punë, duket se për ta ka dritë në fund të tunelit. Gazeta gjermane Spigel shkruan se partia e kancelares gjermane Angela Merkel është duke punuar për hartimin e një ligji të ri për emigracionin. Duke iu referuar burimeve nga partia CDU, Spigel shkruan në shtator do të vendoset për të miratuar një ligj të ri për emigracionin në Gjermani.
Sipas Spiegel, edhe kancelarja Merkel është pro miratimit të një ligji. Më herët ishte Sekretari i Përgjithshëm i CDU, Peter Tauber, që kishte sinjalizuar diçka të tillë, por kishte hasur në kundërshtimin e ashpër të ministrit të Brendshëm, Thomas de Maiziere.
Por Merkel ka dalë në krah të Tauber. Socialdemokratët e majtë kanë kohë që kërkojnë një ligj për të rregulluar kriteret e nevojshme për emigrim në Gjermani.
“Aktualisht në Gjermani ka një fluks emigrantësh si kurrë më parë. Debati politik për këtë çështje është eklipsuar nga sulmet mbi qendrat e azilkërkuesve,” shkruan Spiegel.
Ndërkohë kryebashkiaku i Hamburgut, Olaf Scholz pret që në ligj të përfshihet propozimi i tij për shqiptarët dhe ata që vijnë nga shtetet ish-jugosllave.
“Nëse ata mund të provojnë se mund të bëjnë një punë në Gjermani, t’u mundësohet hyrja e ligjshme. Kjo marrëveshje rekrutimi ka funksionuar më parë me Jugosllavinë,” thotë ai për Spiegel.
“Kjo do ndihmojë së pari ata që vërtet kërkojnë punë, që të mos zgjedhin rrugën e gabuar përmes azilit. Për shumicën e tyre, emigrimi lidhet me një vend pune,” thekson Scholz.
