Mediat lakojnë dy emra së fundi, për kreun e Televizionit Shqiptar. Një garë që kulmon një periudhë të gjatë pezullie, pas zgjedhjeve të vitit 2013, kur mosrinovimi i organeve drejtuese të institucionit, bllokoi emërimin e një drejtori të përgjithshëm. Detyra e vështirë e drejtori në detyrë, gazetarit të vjetër Martin Leka, për të sjellë në ekuilibër një gjigand të fjetur, pritet të marrë fund me emërimin në postin drejtues të një emri të ri. Sipas shtypit, ka për të qenë një garë mes shkrimtares së njohur Elvira Dones dhe pedagogut e gazetarit me përvojë Ilir Yzeiri.
RTSH është një markë e vjetër e mediave shqiptare, një vatër historike e përgatitjes së qindra gazetarëve me emër, qysh në fillim të viteve ’60, e më pas, kur ishte për shumë kohë e vetmja media elektronike e vendit. Rikthimi i RTSH në postin dhe rolit që i takon, do ta normalizonte të gjithë ekosistemin e mediave elektronike, që ndër vite ka qenë pre e një lufte të heshtur interesash politike, ekonomike dhe tregu.
