Komisioni i Pavarur i Kualifikimit ka bërë te ditur sot se gjyqtari Besnik Imeraj dhe ish kryeprokurori Adriatik Llalla janë të vetmit që kanë dhënë dorëheqjen deri tani nga trupa e sistemit të drejtësisë. Komisioni i Pavarur i Kualifikimit ka zbardhur vendimin për të ndërprerë procesin e rivlerësimit kalimtar për ish Kryeprokurorin Adriatik Llalla.
Vendimi i cili vjen pasi Llalla deklaroi se nuk do të merrte një post në Gjykatën e Apelit, mban firmën e tre anëtarëve të trupës gjykuese, Roland Ilia kryesues si dhe Pamela Qirko dhe Olsi Komici anëtarë. KPK ben te ditur se Llalla nuk mund te emerohet per 15 vite ne sistemin e drejtesise.
Deklarata e Komisionit të Pavarur të Kualifimimit
Fillimisht Komisioni i Pavarur i Kualifikimit ju falënderon për korrektësinë që keni treguar deri më tani me trajtimin e kronikave që kanë pasur të bëjnë me procesin e rivlerësimit kalimtar të gjyqtarëve dhe prokurorëve në Republikën e Shqipërisë.
Në përgjigje të pyetjes suaj të parë, KPK ju sjell në vëmendje se çdo subjekt ka të drejtë të japë dorëheqjen, sipas asaj që parashikon neni “G” i Aneksit të Kushtetutës. Subjektet e rivlerësimit e depozitojnë atë në organet përkatëse.
Komisioni ka bërë publik emrat e dy subjekteve të rivlerësimit, të cilët dhanë dorëheqjen nga sistemi i drejtësisë, Z. Besnik Imeraj dhe Z. Adriatik Llalla. Për subjektin Imeraj, trupa gjykuese e ka bërë publik vendimin e arsyetuar në faqen zyrtare të institucionit, ndërsa për subjektin Llalla, treshja e komisionerëve po punon për hartimin e vendimit të arsyetuar, vendim i cili do të njoftohet edhe publikisht.
Afati i zbardhjes së vendimit është brenda 30 ditëve dhe Komisioni i Pavarur i Kualifikimit ju garanton se do të respektojë ligjin në germë dhe frymë.
