Shërbimi i Kontrollit të Brendshëm në Sistemin e Burgjeve ka arrestuar një oficer të policisë së Institucionit të Ekzekutimit të Vendimeve Penale, Burrel, të dyshuar për “korrupsion pasiv ndaj gjyqtarëve, prokurorëve dhe funksionarëve të tjerë të drejtësisë”, si dhe “shpërdorim detyre”.
Ndalimi i oficerit Alberd Xhemal Patushi, 45-vjeçarit nga Burreli që mbante detyrën e specialistit të trupës pranë IEVP-së së Burrelit, u ndalua të premten e 6 korrikut në orën 21, pas një hetimi tremujor në funksion të procedimit penal të Prokurorisë së Krimeve të Rënda të Tiranës.
Alberd Patushi dyshohet t’iu ketë marrë disa të dënuarve në burgun e Burrelit shuma të konsiderueshme parash, duke përfituar nga pozicioni i punës dhe duke iu premtuar ndikim te funksionarët e sistemit të drejtësisë për t’iu mundësuar atyre fitimin e lirisë në mënyrë të jashtëligjshme.
Tashmë 45-vjeçari do të përballet me procedurat e mëtejshme të Prokurorisë së Krimeve të Rënda, në Tiranë.
a.ç
