Kryeministri Edi Rama dhe homologu i tij shqiptar i Malit të Zi, Dritan Abazoviç teksa ndodhen në Ohër në kuadër të samitit për “Open Balkan” , kanë prezantuar projektin e urës që do të lidhë Velipojën me Ulqinin.
Kreu i Fondit Shqiptar të Zhvillimit tha se ura do të shkurtojë një distancë shumë të madhe dhe do të ketë një gjatësi prej 310 metra. Kostoja është vlerësuar të jetë 9 milion euro.
Kryeministri Rama sqaroi se në gusht përfundon projekti i detajuar, ndërsa theksoi se kjo është fryma e “Ballkanit të Hapur”.
“Ky është projekti dhe në fund do të përfundojë i detajuar. Pas projektit të detajuar do të ulemi sëbashku menjëherë. E kam fjalën Fondi Shqiptar i Zhvillimit me agjencinë tuaj. Kjo është fryma e Ballkanit të Hapur. Pres me padurim të vij t’ju vizitoj në Malin e Zi me shpresë brenda korrikut dhe në gusht për t’ju dorëzuar projektin”, tha Rama.
Ndërkaq, kryeministri malazez Dritan Abazoviç u shpreh i lumtur për projektin. Sipas tij ndërtimi i kësaj ure do të sjellë zhvillim për të dy qytetet në dy anët e Bunës.
“Jam shumë i lumtur për këtë projekt. E kemi diskutuar në Tiranë verën e kaluar dhe tani jemi shumë pranë fillimit të punës konkrete. Kjo zonë mund të jetë një zonë shumë tërheqëse turistike në të ardhmen.
Do të jetë njësoj për turistët siç shkojmë ne në pjesë të tjera të Evropës. Kjo do ta lehtësojë shumë qasjen e turistëve. Kjo është mënyra sesi ne mund ta zgjidhim problemin e trafikut pranë Shkodrës. Do të jetë shumë mirë.
E thjeshtë. Është shumë irracionale që dikush nuk e ka bërë më parë. me këtë urë do të kemi shumë efekte pozitive në të dyja anët dhe ndërlidhshmëria midis dy vendeve të jetë e madhe. Ura dëshmon që nuk jemi vetëm Ballkan i Hapur, por në një fazë e re. Kjo është një urë që do të përdoret nga shumë njerëz që do të vizitojnë dy vendet tona”, u shpreh Abazoviç.
Një urë që pritet të përfundojë për 18 muaj do të shkurtojë distancën mes Velipojës dhe Ulqinit.
“Me projektin e urës se re do të kemi një distancë të shkurtuar 73 herë midis 2 zonave. Ura do jetë 380 m me 3 harqe, është e kategorisë C1 dhe do përdoret për makinat, kalimtarët e biçikletat dhe do të ketë 2 korsi dhe pjesë të vendpushimeve.
Brenda 2 muajve do të jetë gati projekti dhe më pas procesi i buxhetimit dhe i prokurimit do të kërkojë 6 muaj, deri në qershor 2023, dhe mund të përfundojë brenda 18 muaj.
Do kushtojë 9 mln euro”, tha një prej përfaqësuesve të projektit, gjatë takimit të Ramës dhe Abazoviç.
Bashkëbisedimi i plotë:
Edi Rama: Ky është projekti dhe si u shpjegua në gusht do përfundojmë projektin e detajuar dhe pastaj do të ulemi së bashku menjëherë, FSHZH me agjencinë tuaj kushdo qoftë ajo.. Dhe do të vijojmë punën.
Dritan Abazoviç: Jemi shumë pranë fillimit të punës konkrete. Mali i Zi ka caktuar një pjesë të fondit kushtuar urës. Ndoshta nuk do të përdoret dot këtë vit megjithatë në momentin që përfundojnë projektin e detajuar mund të nënshkruajmë memorandumin. Kjo zonë që prej fillesës së bregdetit në Ulqin mund të jetë një zonë tërheqëse turistike në të ardhmen.
Megjithatë kjo është mënyra si ne mund ta zgjidhim bllokimin e trafikut pranë Shkodrës, në pikën kufitare. Duke qenë se një pjesë e kamionëve do të kalojnë nga kjo anë. Është shumë e thjeshtë dhe shumë irracionale që dikush nuk e ka bërë më parë.
Me këtë urë do të kemi shumë efekte pozitive në të dyja anët. Ura dëshmon që nuk jemi vetëm Ballkan i Hapur por jemi në një fazë të re të mënyrës si i kuptojmë marrëdhëniet dy palëshe. 100% keni mbështetjen time. Le të vijojmë menjëherë drejt projektit përfundimtar
Edi Rama: Kjo tashmë është e qartë sepse ekipi ka punuar. Duhet të përcjellim projektin e detajuar. Njerëzit tuaj do bëjnë një vlerësim të buxhetit. Në momentin që buxheti finalizohet. FSHZH i ka paratë. Arsyeja pse nisëm ta bënim me ta është sepse ata mund t’i transferojnë paratë për vitin tjetër pa kufizime. Më duhet të shtoj edhe diçka.
Tani po ndërtojmë rrugën turistike Shëngjin Velipojë që do ta bëjë rrugën nga Ulqini edhe deri në Shëngjin shumë të shkurtër. Zhvillim po por edhe shumë komunikim që do të përmirësohet për shkak të kësaj. Qytetarët do të vijnë dhe do të ikin pa bërë gjithë këtë Tour de France rreth e rrotull.
Ky është vizioni juaj. Nuk duhet të grindemi kush pati idenë më të mirë por të zbatojmë këto ide. Kjo është fryma e Ballkanit të Hapur. Gjithçka tjetër që njerëzit mund të thonë nuk ka problem por kjo është fryma. Brenda korrikut do të vij të ju takoj në Mal të Zi.
/m.j
