Analisti Plator Nesturi në një lidhje Skype për “Fax News” foli mbi zhvillimet politike që pritet të ndodhin në shtator.
Nesturi theksoi se si ky shtator do të ketë dhe shumë të tjerë e se retorika politike do jetë po e njëjta. Sipas tij nuk mundet të bëhen ndryshime të mëdha nga opozita shqiptare sot, pasi ajo ende ka ‘betejë’ të brendshme sa i takon unisonit dhe lidershipit.
“Do të ketë dhe shumë shtatorë të tjerë dhe do të zhvillohet e njëjta retorike politike. Opozita ka betejë të brendshme dhe çështje të bartura që kanë të bëjnë me kompaktësinë e vet, nuk është në unison, pavarësisht se dalin përditë për ta mbajtur të ngrohtë frymën opozitare.
Kriza në vetvete ka të bëjë me lidershipin e vet dhe aspekte të tjera që lidhen me drejtësinë, dhe janë një mënyrë për tu hedhur jorganin problematikave të brendshme. Nuk besoj që një forcë politikë e tillë arrin të katalizojë problemet e qytetarëve nëse nuk zgjidh problematikat e saj të brendshme. Nëse është kështu, në shtator hyjmë me këmbë të keqe, jo të mbarë!
Jo gjithmonë retorika u përgjigjet situatave aktuale. Opozitën e shoh si faktor shumë më të madh sesa emra të përveçëm. Debati je me Berishën apo jo e bën këtë forcë politike të mos shkëputet nga e vjetra dhe të jetë parti moderne.
Zgjidhja e problemeve të brendshme fillon me besueshmërinë te qytetarët, një parti duhet të ngrihet mbi vetveten me evoluim të brendshëm. Nuk mendoj që viti 2022, 2025 do të ketë të njëjtën rezonancë me vitin 2005. Figurat që e kanë bërë atë periudhë nuk mund të merren si e vetmja mundësi për të ndërtuar të ardhmen”-u shpreh analisti.
/e.d
