Java e fundit e ka vënë edhe një herë tjetër në qendër të vëmendjes ish-konkurrentin e Big Brother Kreshnik Husaj, i njohur në publik si Kika. Dyshimet se ka detyruar ish-bashkëshorten të prostituojë e kanë çuar Kikën në paraburgim në Pejë që nga 13 dhjetori i vitit të kaluar. Ai është i akuzuar për veprën penale të mundësisë ose detyrimit në prostitucion të ish-bashkëshortes.
Lajmin e ka konfirmuar për Prive edhe zyra për informim nga policia e Kosovës, ndërsa akuza që rëndon mbi të është konfirmuar edhe nga akt-vendimi zyrtar i prokurorisë, sipas të cilit, dënimi për këtë vepër penale mund të jetë me gjobë ose me burg deri në tre vjet.
Sipas “Prive” në aktvendimin për fillimin e hetimeve shkruhet ndër të tjera se Kika e ka detyruar bashkëshorten të merret me prostitucion. Ai ia gjente vetë klientët me arsyetimin se është gruaja e tij dhe se nëse nuk pranon do të ndahet nga ajo. Pasi sollën në jetë një vajzë, Kika ka vazhduar t’i gjejë klientë dhe ta detyrojë të kryej marrëdhënie me ta, duke e kërcënuar kësaj here se nuk do ta lejonte të takonte më vajzën.
Por sipas avokatit mbrojtës të ish-konkurrentit të Big Brother, Kika është akuzuar për një vepër penale që nuk e ka kryer. Aktualisht tha avokati i tij vijojnë të merren në pyetje dëshmitarë, të cilët nuk kanë pasur dëshmi kundër Kikës. E gjithë kjo ngjarje, cilësoi avokati, është një hakmarrje nga ish-bashkëshortja e Kikës. Pak kohë pas daljes nga Big Brother dhe akuzave të ish-bashkëshortes se ishte homoseksual, deklarata e rëndë e Kikës në “Zonë e lirë” për ish-vjehrrën dhe ish-bashkëshorten e kanë bërë këtë të fundit të hakmerret./a.m.
