Një debat mbi mbrojtjen e pasurive natyrore nga ndërtimi i HEC-eve është ngritur ditët e fundit, debat në të cilin është përfshirë tanimë edhe politika.
Debatit për mbrojtjen e pasurive natyrore nga këto investime i është bashkuar edhe partia demokratike, e cila kur ishte në pushtet rezulton të ketë ndjekur një politikë tërësisht në favor të ndërtimit të HEC-eve.
“Do bëjmë gjithçka për të shfrytëzuar pasuritë natyrore. Shqipëria ka pasuri të shumta. Do ndërtojmë HEC-e në zonat më të bukura të vendit”.
Kështu deklaronte në vitin 2011 ish Kryeministri Sali Berisha, i vendosur për të sakrifikuar çdo bukuri në natyrore për ndërtimin e 443 heceve në vend.
Madje në programin qeverisës të vitit 2009-2013, qeveria e tij zotohej t’u garantonte ndërtuesve lidhjen e tyre me sistemin energjitik të vendit, kudo që ata ndërtojnë.
Në vitin 2010, Berisha shkoi më tej, duke konfirmuar për mediat italiane mbështetjen e qeverisë shqiptare për prodhimin e energjisë nukleare në vendin tonë.
“Shqipëria do të shndërrohet në “supër fuqi” të vogël energjitike në Ballkan, në një qendër të rëndësishme të prodhimit të energjisë elektrike. Centrali bërthamor do të ndërtohet në Shqipëri”, deklaronte Berisha.
Po kryeministri i atëhershëm Sali Berisha, ndërsa inaguronte hidrocentralin e Tervollit në Gramsh, deklaronte se vendi do të kthehej në superfuqi energjitike, pasi në Gramsh do të ndërtoheshin edhe 14 HEC-e të tjera.
Në këtë mënyrë, ndërtimi i HEC-eve dukej se ishte një politikë e pastër qeveritare, por edhe më shumë se kaq, Berisha ishte kundër çdo lloj anullimi apo pezullimi të punimeve për ndërtimin e hidrocentraleve.
“Të deklarosh se do anuloj ndërtimin e 320 hidrocentraleve do të thotë të mbledhësh fuqitë negative të natyrës dhe t’i derdhësh kundër vendit tënd”, deklaronte Berisha. /Lexo.al
/a.rada
