Kryeministri i Australisë ka paralajmëruar tenistin numër një në botë, serbin Novak Gjokoviç se do të “kthehet në shtëpi me avionin e parë të radhës” nëse nuk mund të shpjegojë “vërtetimin mjekësor” që e përjashton atë nga kryerja e vaksinës Anti- Covid.
Këtë vërtetim ai e ka marrë për ta lejuar të luajë në “Australian Open”.
Ylli serb i tenisit do të arrijë në Melburn sonte ku do të mbrojë titullin e tij në turneun e 17-30 janarit, pasi kishte marrë një vërtetim mjekësor për t’u përjashtuar nga vaksinimi kundër COVID-19.
Tenisti kishte njoftuar në rrjetet sociale se kishte marrë një vërtetim që do ta lejonte të luajë në turne dhe po shkonte për në Australi.
“Daily Mail” shkruan sot se kryeministri australian Scott Morrison ka paralajmëruar Gjokoviçin se ‘ai nuk do të trajtohet ndryshe nga të tjerët’ dhe do të ndalohet të hyjë në vend nëse vërtetimi i tij mjekësor vlerësohet ‘i pamjaftueshëm’.
Kryeministri australian Morrison tha në një konferencë për shtyp të mërkurën: “Nuk duhet të ketë fare rregulla të veçanta për Novak Gjokoviçin. Asgjë… Ne presim prezantimin e tij dhe çfarë provash na ofron për ta mbështetur këtë përjashtim’.
Australianët, shumë prej të cilëve janë ndarë nga të dashurit e tyre që i kanë jashtë shtetit dhe nuk i kanë takuar për muaj të tërë, kanë reaguar ashpër ndaj “Australia Open” dhe zyrtarëve të shtetit lindor të Australisë, Victoria, ku gjendet edhe kryeqyteti i vendit Melburni, që i dhanë Gjokoviçit mundësinë për t’u trajtuar ndryshe në këtë rast.
Më herët tenisti serb ka deklaruar se është ‘kundër vaksinimit’.
