Këtë të hënë do të mblidhet për herë të fundit Komisioni i Posaçëm i Reformës në drejtësi, i cili pritet të dalë me një draft të përbashkët. Mbledhja nis me shqyrtimin e kapitulli të fundit të ndryshimeve kushtetuese dhe do të nisë rreth orës 15:00.
E premtja e shkuar ishte takimi i fundit mes opozitës e mazhorancës në komision, nga ku kanë dalë një sërë çështjesh që ndajnë palët nga njëra tjetra. Siç dihet tashmë, opozita ka shtruar në tavolinë një draft paralel ku ka jo pak ndryshime me draftin aktual të kompozuar nga ekspertët.
PD kërkon që Këshilli i Emërimeve të mos ekzistojë, ndërsa për formulën e votimit të drejtuesve të Institucioneve më të larta, kërkon që votimi të bëhet me 2/3 (94 vota) deri në shtator të vitit 2017. Maxhoranca e cila mbështet draftin e propozuar nga ekspertët është kundër shkrirjes së Këshillit të Emërimeve dhe ende nuk është prononcuar në lidhje me formulën e votimit.
Nga ana tjetër, opozita kërkon gjithashtu që mandatet e të zgjedhurve në institucionet e larta të mos mbarojnë (si psh ai i Kryeprokurorit Adriatik Llalla) por të vihen në sitën e kontrollit apo vetingut.
Pritet që sot mbledhja e komisionit të vërë pikat mbi i dhe të shihet nëse prej aty, do të dilet me një draft të përbashkët që do të miratohet në parlament apo me qëndrime të kundërta që mund të sjellin humbjen e shansit për të votuar reformën. java/ a.k
