Në një kohë kur në Shkodër edhe virusi ka marrë ngjyrim politik për shkak se kryebashkiakja Voltana Ademi ka urdhëruar masa në kundërshtim me institucionet shëndetësore ku për pasojë ka pasur një rritje të ndjeshme të numrit të rasteve, ish-kryetarja e Kuvendit Jozefina Topalli ka treguar qasjen e saj.
Në një intervistë për Report Tv, Topalli ka rrëfyer se çfarë do kishte bërë ndryshe për menaxhimin e situatës së COVID-19.
“Do shkoja lagje më lagje, kafe më kafe, dhe do iu isha lutur që të respektonin masat, nuk do lejoja që tregjet të ishin ashtu, por do kisha punuar që tregjet të kishin standarde”, tha Topalli.
Ndërkohë, e vendosur në vendin e kryetares së opozitës, ish- kryetarja e Kuvendit, Jozefina Topalli tha se do të bashkëpunonte me qeverinë në këtë situatë, pa e përdorur për pushtet.
Ish- kryetarja e Kuvendit, ka marrë si shembull Portugalinë dhe Spanjën, për të vënë në pah se respektimi i masave është shumë herë më i i rëndësishëm se testimi në masë.
Ajo zgjodhi që të mos e komentonte politikisht, por tha se shumë e rëndësishme është mbyllja në shtëpi, vendosja e maskave, ruajtja e distancës. Kjo është ajo që sjellë një kurbë më të ulët, shprehet Topalli, duke dalë kështu në mënyrë indirekte kundër kërkesës së PD, që kërkon më shumë teste.
“Debati për testimet është debat global, nuk mund ta trajtojmë këtë cështje thjesht si në Shqipëri se është betejë planetare, janë tema të debateve që zhvillohen në çdo vend. Shikoni Portugalin dhe Spanjën, në Portugali vetëm për shkak të zbatimit të masave numri i të prekurve është shumë më i ulët se ai në Spanjë, prandaj ftesa ime është që të qëndrojnë në shtëpi, të vendosin maskën dhe të respektojnë distancën kur e kanë të domosdoshme”, tha Topalli.
