Kryedemokrati Lulzim Basha zbardh detaje nga mbledhja online nëpërmjet videokonferencave me drejtuesit dhe përfaqësuesit e Partisë Demokratike në të gjithë Shqipërinë, lidhur me situatën e rëndë që po kalon vendi prej koronavirusit.
Ai thotë se e përbashkëta kudo është që qytetarët janë në vështirësi për të siguruar jetesën e përditshme, ku shteti ka lënë në harresë mijëra familje në nevojë dhe biznese.
“Shumica nuk kanë marrë akoma asnjë ndihmë apo mbështetje nga qeveria, ndërkohë që ju duhet të paguajnë edhe faturat e rritura të dritave dhe ujit. Ne do vazhdojmë të jemi në kontakt me njerëzit për t’ju dhënë zë problemeve dhe halleve të tyre në këto ditë të vështira. Pa asnjë vonesë, qeveria duhet të shpërndajë fondet e mbijetesës dhe të përfshijë menjëherë të gjithë familjet dhe njerëzit në nevojë”, shkruan Basha.
Ai i kërkon qeverisë që të mbështesë sipërmarrjen në vështirësi mbijetese, biznesin e vogël, fermerët, fasonët, bizneset prodhuese dhe turizimin, pa përjashtuar askënd.
Sipas tij, shqiptarët që kanë paguar këto 7 vjet taksat ndër më të lartat në rajon, kanë sot nevojë për ndihmën që ju takon nga shteti, “Qeveria nuk mund t’i fshihet përgjegjësisë”.
g.kosovari
