Kryetarja e LSI-së, Monika Kryemadhi thotë se Presidenti Ilir Meta mezi pret të lërë Presidencën. Kreu i Shtetit është shprehur se ai do të rikthehet në partinë që themeloi, por nuk e ka cilësuar nëse do ta drejtojë.
Kryemadhi e pyetur nëse do të japë dorëheqjen nga kreu i LSI-së kur Presidenti Meta të lërë detyrën, ajo shprehet se e ka përfunduar misionin e saj në 25 prill.
“A mezi po e pret LSI Ilir Metën? Po. A do Meta të dalë nga Presidenca? Po, mezi po pret me dalë. Meta flet pa dorashka dhe nuk ka kompleksin për të folur para të gjithë televizioneve, gazetarëve, është i hapur. Të krahasosh me të pa krahasueshmen.
Monika Kryemadhi bëri diçka që mendoj se mund të sillte një risi për një grua në politikë. Misioni i Monikës dështoi më 25 prill. Nëse një grua dhe nënë beson për të mirën e një gjenerate të re dhe shoqëria nuk është gati për të luftuar për fëmijët e tyre, por janë të gatshëm për të shitur 4 vite jetë për një bonus qiraje, për një të mirë momentale.
Qoftë në Shkodër, Tiranë, Lezhë, Durrës, më vjen keq që aleanca kundër grave ka qenë perfekte ku janë përdorur mediat, paratë, shteti, diplomacia, kundër të rinjve e të rejave. Kjo është një sfidë që vijon për popullin shqiptar. Unë do të jem mbështetëse e LSI e të rejave dhe grave”, tha Kryemadhi./m.j
