Partia Demokratike ka reaguar pas deklaratave të Presidentit Ilir Meta, i cili tha sot në Komisionin hetimor parlamentar se më datë 8 qershor ka patur informacion për një plan i cili synonte të digjej Kuvendin e Shqipërisë.
Sipas Metës kjo ishte një ndër arsyet që ka vendosur shtyrjen e datës së zgjedhjeve.
I pyetur nga “Panorama”, Sekretari i Përgjithshëm i PD-së, Gazment Bardhi deklaroi se opozita e bashkuar nuk ka patur kurrë një plan të tillë.
Bardhi pohoi se edhe kryetari i opozitës, Lulzim Basha në qëndrim e tij publike ka kërkuar që të përfaqësuesit e opozitës të distancohen nga skenarët e dhunës.
“Partia Demokratike dhe opozita e bashkuar nuk ka pasur kurrë asnjë plan për djegien e institucioneve, pavarësisht se ato nuk përfaqësojnë interesin publik, por interesin e një grupi oligarkësh dhe kriminelësh të lidhur me kryeministrin e vendit.
Partia Demokratike fton mediat të hapë arkivat e javëve përpara 30 qershorit dhe do të gjejë se opozita dhe kreu i saj, Lulzim Basha, ka denoncuar skenarët e dhunshëm të Edi Ramës, që ka patur për qëllim t’i përdorë më pas kundër PD dhe opozitës.
Në këtë këndvështrim, duhet të lexohet edhe deklarata e Presidentit Ilir Meta, i cili u shpreh se “nuk mund të pranonte një Rajshtag në Shqipëri”. Të gjithë e dinë se me djegien e dyshimtë të Parlamentit gjerman, Hitleri çimentoi pushtetin nazist pas ardhjes në pushtet pak kohë para djegies së Rajshtagut”, tha Gazment Bardhi për “Panorama”.
Më tej Sekretari i Përgjithshëm i PD u shpreh se Komisioni hetimor për shkarkimin e Presidentit ështënjë mjet për të mbuluar skandalet e qeverisë ilegjitime të Edi Ramës.
“Partia Demokratike e konsideron komisionin hetimor për shkarkimin e Presidentit si një mjet për të mbuluar skandalet e qeverisë ilegjitime të Edi Ramës, ndërsa anëtarët e këtij komisioni, personazhe të dosjeve 184 dhe 339, si bashkëpunëtorë të krimit në vjedhjen e zgjedhjeve lokale dhe parlamentare”, tha ai.
g.kosovari
