Kryedemokrati Lulzim Basha ka reaguar për djegien e mbetjeve urbane në Fier. Nëpërmjet një serie statusesh në “Twitter“, kreu i PD, shkruan se kjo katastrofë po helmon fëmijët.
Ai nënvizon se PD ka depozituar në SPAK faktet, si dhe shton se është koha për të ngritur zërin, për veten, shëndetin, e familjet tona. Ndërkohë, Basha ankohet se po censurohet fjala e lirë. Sipas tij, mafia e inceneratorëve ka blerë heshtjen e mediave.
Postimi i plotë i Lulzim Bashës:
Shikojini këto imazhe të tmerrshme. Dita e katërt e katastrofës mjedisore në Fier. E njëjta skemë kriminale si në Durrës e Kavajë. Digjen plehrat, helmohen familjet, vetëm që të justifikojnë më pas pagesa të majme inceneratorëve me aksionerë mafian dhe qeveritarët e korruptuar.
Viktimat janë njerëzit që helmohen dhe vidhen. Hesht drejtësia, edhe pse ka muaj që PD ka depozituar në SPAK faktet: mbi 400 milionë euro të taksave të shqiptarëve që qeveria ja ka dhuruar inceneratorëve. Censurohet media: heshtje e blerë nga mafia e inceneratorëve.
Kështu e do regjimi Shqipërinë: pa të drejta, pa liri, pa të vërteta. Prandaj shkel ligjet, pasurohet duke vrarë shëndetin dhe ekonominë, grabit buxhetin e shqiptarëve, shantazhon dhe blen drejtësinë dhe median. Askush nuk mund të pretendojë se nuk e sheh dhe nuk e kupton.
Demokracia vdes në heshtje. Koha për të ngritur zërin! Për veten tuaj, për fëmijët dhe shëndetin e familjeve tuaja. Për taksat tuaja të vjedhura dhe të drejtat tuaja të dhunuara!
/a.r
