Tre familje në zonën e Dragobisë në Tropojë mbetën pak ditë më parë në qiell të hapur për shkak të një shkëndije elektrike që shkrumboi kullën 200 vjeçare ku jetonin. Ministri i Mirëqenies Sociale dhe Rinisë, Blendi Klosi udhëtoi sot drejt Dragobisë, për t’iu ofruar ndihmesën e nevojshme anëtarëve të familjeve Ismalaj, në zonën që prej ditësh është e mbuluar nga dëbora dhe me vështirësi aksesi për automjetet, duke u premtuar strehim në një banesë në qytetin e Bajram Currit, dhe restaurim të kullës së tyre.
“Jemi këtu në Dragobi, së bashku me nënprefektin e Qarkut të Kukësit, në shtëpinë e një patrioti të vjetër dhe një nga më të vjetrat e zonës, e cila fatkeqësisht gjatë ditëve të fundit është djegur dhe është bërë e pabanueshme. Jemi për ta ndjekur nga afër këtë situatë dhe të gjejmë një zgjidhje të shpejtë duke bashkëpunuar me biznesin e zonës dhe me mundësitë që kanë emergjencat civile për ta sistemuar familjen në qytetin Bajram Curri e më pastaj këtë shtëpi monument kulture, simbol i historisë së kësaj zone, ta kthejmë në simbol të dëshmisë historike të jetëgjatësisë së saj”,- tha ai.
Me zhbllokimin e zonës nga dëbora, familjet do të ndihmohen edhe për rindërtimin e banesës, një nga më të vjetrat e krahinës ndërtuar nga të parët e tyre më shumë se 200 vjetër më parë. Familjarët thonë se ka edhe vlera historike, pasi ajo ka shërbyer në kohën e luftës si vendi i mbledhjes dhe i strehimit të patriotëve shqiptarë të kësaj zone.
ma.me
