Dy ditë pas djegies së anijes turistike “Aqua Marine”, në gadishullin e Karaburunit, Kapiteneria e Portit ka vendosur të ushtrojë një kontroll tek anijet e tjera turistike, për të shmangur një tjetër ngjarje të tillë.
Nga kontrolli i ushtruar ka rezultuar se 98% e anijeve turistike zbatonin kriteret, ndërsa pjesa që nuk plotësonin kërkesat janë bllokuar nga Kapiteneria.
“Duke marë shkas nga situata e fundit e ndodhur ne bordin e anijes turistike Auamarine e cila u përfshi në flak deri në djegien totale të saj duke rrezikuar jetën e njerëzve që ishin në bord , të cilët fal shpejtësisë dhe aftësive të tyre arritën të shpëtonin veten nga flakët, po në të njëjtën ditë që ndodhi situata jo e mirë për imazhin e turizmit dhe Vlorës, Kapiteneria e Portit Vlorë mori një sërë masash dhe kontrollesh të detajuara të paisjeve zjarrfikse në këto anije turistike të cilat rrezultuan 98% konform certifikatës së rregjistrit detar shqiptar e cila është përgjegjëse për numrin dhe tipin e mjeteve zjarrfikse në bazë të kapacitetit të anijes dhe tipit të saj.
Anijet që nuk plotësonin kërkesat në lidhje me mjetet zjarrfikse të cilat duhet të ishin në bord të kolauduara u bllokuan nga Kapiteneria e Portit Vlorë deri në plotësimin e plotë të tyre”, thuhet në njoftimin e Drejtorisë së Përgjithshme Detare.
Gjithashtu një masë tjetër për anijet turistike +12pasagjer u mor për ndalimin e lundrimit natën me pasagjer në bord.
