Djali i presidentit amerikan, Donald Trump, ka publikuar disa “e-mail”-e që dëshmojnë se atij i ishin ofruar informacione të ndjeshme për Hillary Clintonin nga një shtetas rus.
Publicisti Rob Goldstone, ish-partner biznesi i manjatit të pasurive të paluajtshme në Rusi, i thotë Donald Trump Junior se eksiztonin informacione të siguruara nga Rusia, që do t’i vinin në ndihmë babait të tij gjatë fushatës për presidencialet e muajit nëntor.
Në të kaluarën, Goldstone ka mohuar të ishte në dijeni të përfshirjes së qeverisë ruse në zgjedhje. “E-mail”-et që Trump Jr. i publikoi në rrjetin social “Twitter” thonë se, kryeprokurori i Rusisë ishte ofruar t’i jepte ekipit të fushatës së Trumpit disa dokumente e informacione zyrtare, që do të inkriminonin atëherë kandidaten Hillary Clinton.
“Emin më tha që të të kontaktoja. Prokurori i Përgjithshëm rus u takua me babain e tij dhe në atë takim premtoi t’i sigurojë fushatës së Trumpit informacione të ndjeshme për Hillary Clinton. Ato do ta zhysnin në telashe e do të demaskonin lidhjet e saj me Rusinë. Për babain tënd do të ishin shumë të dobishme”, shkruan Goldstone.
“Nëse është vërtet siç thua, do të ishte fantastike”, ka qenë përgjigjja e djalit të presidentit. Disa ditë më parë, Trump Jr. pranoi se ishte takuar me avokaten ruse, Natalia Veselnitskaya, më 9 qershor të vitit 2016, pasi i ishte thënë se ajo kishte materiale kompromentuese për Clintonin. Megjithatë, ai këmbëngul se avokatja nuk i kishte ofruar informacione të rëndësishme, e se donte të fliste për sanksionet kundër individëve rusë.
a.ç
