Me rastin e ditëve të nëntorit shqiptar në Dyseldorf të Gjermanisë, Kreu i Parlamentit Ilir Meta, i shoqëruar nga Ministrja e Kulturës Mirela Kumbaro, ambasadori shqiptar në Gjermani Artur Kuko si dhe Konsullja e Nderit, Anduena Stephan, mori pjesë në koncertin festiv, të organizuar atje. Konsullja e Nderit, znj. Anduena Stephan vlerësoi vizitën e Kryetarit të Kuvendit z. Ilir Meta.
“28 nëntori është festa e të gjithës shqiptarëve. Për ne këtu në Gjermani dhe për diasporën ishte një përvjetor shumë i veçantë sepse mes nesh patëm edhe Kryetarin e Kuvendit të Shqipërisë, z. Meta, i cili pati takime të nivelit të lartë me shumë përfaqësues të politikës Gjermane të Landit tonë dhe të Parlamentit.
Ky aktivitet përveç aspektit politik, u shoqërua me festime edhe nga ana kulturore. Ishte jashtëzakonisht e veçantë ekspozita e artit shqiptar , që u mbajt në godinën e Parlamentit të Landit dhe do të vazhdojë të jetë e hapur për të gjithë publikun gjerman edhe në vazhdimësi.
Kjo ekspozitë dha impresionet e para të punimeve kulturore në fushën e artit pamor. Po ashtu, tepër e veçantë ishte dhe koncerti i madh festiv që u bë në praninë e më shumë se 450 të ftuarve në qytetin e Dyseldorfit në një sallë jashtëzakonisht të veçantë që mban dhe emrin e një nga kompozitorëve më të shquar të Landit tonë, Robert Schuman dhe në të cilën u shpalosën vlerat e kulturës shqiptare si dhe asaj simfonike, baletit kontemporan, të muzikës iso-polifonike dhe asaj qytetare shqiptare. Ishte një event që nga publiku gjerman është mirëpritur jashtëzakonisht pozitivisht. U ndje fort nevoja që aktivitete të këtij lloji të shtohen”, theksoi Konsullja e Nderit, znj. Anduena Stephan.
