Sot, në çdo fillim koncerti, Ervis Behari këndon “Kënga e nënës”. Jo rastësisht! Kërkon t’i tregojë asaj se është gjithmonë me të, në çdo moment. Por edhe ta bëjë krenare atje ku ndodhet… Mes engjëjve.
Ervis Behari ishte sot i ftuar në “S’e luan Topi” në Top Channel, ku foli për fillimet e karrierës së tij në muzikë dhe për këngët e veçanta – ato që kanë lindur nga zemra e u dedikohen njerëzve më të dashur.
E tillë është edhe “Kënga e nënës”. Ajo do të xhirohej ditën që nëna e Ervisit ndërroi jetë nga një sëmundje e rëndë. Këngëtari kujton se pikërisht atë ditë, ndërsa ishte nisur për të xhiruar klipin, mori lajmin nga i ati.
“Kur nëna ime ndërroi jetë, nuk e kam ditur. Unë atë ditë xhiroja klipin “Kënga e nënës”. Rrugës më merr babi dhe më jep lajmin… Adrian Hila ka qenë ai që ka qenë me mua që nga ai moment dhe deri tani. Ai e dinte historinë dhe atë ditë që do xhironim klipin, ka qenë edhe momenti kur ajo ndërroi jetë…”
Kështu ka qenë historia e vërtetë, tregon më tej Ervisi, por është shumë i lumtur sot: “Jam shumë i lumtur, se mendoj që kam bërë gjënë më të mirë që të vazhdoj muzikën, që ta bëj krenare atë në çdo moment të jetës sime, derisa… Dua t’i bëj krenar prindërit e mi për çdo gjë që bëj në jetë. Besoj që është e lumtur edhe ajo për atë që unë kam arritur…”
